財經界又添一位馬年BB，繼前「輪后」趙海珠變阿珠媽後，另一位輪場小花、法興環球股票產品部副總裁蔡秀虹（Eva）亦將於6月中升呢做媽咪，一臉甜絲絲嘅Eva噚日透露一索得男，暫時計劃6月起放16個星期產假，即係成個夏天都可以陪住BB過，認真幸福。
Eva入行超過十年，2010年同做義工時認識嘅另一半拉埋天窗，按計劃今年添丁。Eva噚日繼續如常擔大旗講輪證市場上季表現，雖然懷孕七個月，但佢都唔係好肥腫，佢都話陀得輕鬆，暫時唔覺得生活上有乜改變。
快將躋身新手媽媽，Eva顯得淡淡定定，莫講話唔會好似一般虎媽咁，安排好晒乜班物班畀阿仔，就連係咪要請姐姐幫手都未諗，話要等阿仔出世後，視乎情況再決定，順其自然見步行步，𠵱家反而擔心要捱夜餵奶多啲喎。