睇梁文道專欄（三月二十八日），方知台灣佔領立法院嘅學生指揮林飛帆係一位「台獨左翼」，台獨也者，要將台灣脫離中國獨立，自然係反大陸一派；左翼也者，可能係指左派經濟思維，即反對市場，反對自由貿易，反對經濟開放，主張政府控制物價，不准公用事業加價，向工商界及富人抽重稅，注重財富分配公平等等。既係台獨，又係左翼，則反對兩岸服貿協議，一啲都唔奇，跟隨佢嘅學生未必個個有台獨傾向，但經濟思想左傾，則年青大學生，特別係非經濟學主修生，多數如此。
左派經濟思想之極端，就係共產主義，搞集體經濟，中央規劃，取消民營企業，大搞國有化，食大鑊飯，呢一套由蘇共領頭、中共跟隨，搞咗幾十年，卒之全盤破產，蘇共崩潰，中共改行初級資本主義，於是俄國與中國都富起來，隨即貧富懸殊，財富集中，金權掛帥，貪污盛行，最後益晒美國、英國。呢兩個老牌資本主義民主選舉國家勝在有堅強民主制度，有完整獨立法治系統，重視人權，保護私產，雖則稅率高，遺產稅重，俄國中國富豪還是渴望到倫敦紐約買物業移民彼邦，送子女到美國、英國讀書，最好一去不回如薄瓜瓜。後果如何呢？二三十年之後，不少中國富豪在中國發大財，做了美國人，死後要交遺產稅，多者交到50%咁多，於是森姆叔叔一聲唔該，悶聲發大財，密密收集中國人民財富，世事之諷刺性，莫過於此。
香港當然亦有左翼經濟思想出現，不少民主派議員逢加必反，反對公用事業加價，反對領匯，要求政府回購過海隧道等等。特區政府動用財政儲備購回兩電、兩巴、港鐵及所有隧道之後，電費及交通費就唔會加乎？儍嘅咩，唔加咪即係要納稅人自己承擔，加稅不能避免囉，但香港納稅人少，消費人士多，納稅人那可負擔得咁多？呢類赤化經濟思維，只會搞死香港。台灣人慣咗抗拒開放，慣咗政府干預，台灣人反服貿協議，有其社會原因，香港學生走埋去支持台灣學生反服貿，趕潮流而已！