近期雙馬頻頻四處收購，好似shopping咁，不禁令人想起以往做大刁做到出晒名嘅「紅籌之父」梁伯韜。咁啱佢打骰嘅意馬（585），噚日有人事變動，公司執行副主席兼行政總裁戎子江啱啱好做咗兩年，忽然話要投放更多時間於其他事務，辭去所有職務，今日生效，但公司冇講搵到邊位接替佢嘅職務喎。
戎子江之前係白馬戶外媒體（100）主席，又做過同埋雷士照明（2222）獨立非執董，但分別喺2009年同埋2013年辭職，如今只剩底信星鞋業（1170）獨立非執董一職。
講番意馬，舊年宣佈以6億銀賣咗國產卡通《喜羊羊與灰太狼》商標同版權，並且重操電腦動畫故業，兼做埋教育業務，另外又用咗成億銀喺黃竹坑買咗全層商廈做寫字樓，但一輪動作後就冇晒聲氣，如今連第二把交椅都走埋，睇嚟梁伯韜都要諗諗計至得。