聞說唔少人都係韓國電視game show《Running Man》嘅粉絲，但有幾多人可以睇電視悟出生意經？
菲菲周末同一班朋友走入喺新蒲崗嘅工廠大廈，目的就係做running man，着上寫上自己個名嘅顏色背心，參與呢場鬥智鬥力嘅「撕名牌」遊戲。果然，去到「性命」關頭，就可以表現人性真面目，有人為求自保，不惜欺騙隊員；有人更玩到一仆一碌。經過一輪廝殺後，人人跑到流晒汗，重拾細個玩「捉迷藏」嘅感覺。
八卦如我當然搵老闆傾吓計，老闆娘莊太就話，同老公Billy睇《Running Man》睇得咁開心，睇人玩不如自己玩。於是投資200萬銀去執靚一個逾萬呎嘅場，打造Running Games。「細個會玩捉迷藏，𠵱家人人只靠WhatsApp溝通，太悶啦。」
菲菲落場互片當日，同場仲有幾隊人玩，氣氛唔錯。不過舖頭12月開業初期都跣腳蝕10萬銀，但好快成功上位，第二個月收支平衡之餘仲開始回本。香港人貪新忘舊，所以公司每月都出新game，力求保鮮。目標帶呢盤生意衝出香港，首站台灣。但是佢同密室逃脫game唔同，玩game時職員全程陪玩。
難得佢哋玩足咁多場，都仲投入認真跑，身上留下唔少「戰績」，所以咪以為一份全職去玩嘅工好易撈。
Fifi
本欄逢周二、四刊出