噚日繼續磅砣大雨，中環人食晏都係搵啲近近哋，最好係商場穿過商場就到嘅地方。有「長江一號」之稱嘅李業廣就選擇喺置地廣場正中心嘅咖啡座跟朋友食晏，見佢都係掛住傾偈多啲，坐佢對面呢位朋友雖然唔係財經界知名人士，但分分鐘係超級隱形富豪都未定。
77歲嘅李業廣未言休，每日都會返去自己有份創立嘅律師樓，律師樓喺怡和大廈（前稱康樂大廈），所以不時喺中環見到佢蹤影，佢亦都幾鍾意去置地呢間咖啡座食晏㗎。
除咗李業廣，會德豐（020）副主席梁志堅噚日亦都喺置地開餐，不過佢就去「娛樂大亨」林建岳旗下私隱度較高嘅唐人館，見佢一個人一點鐘左右上去，個半鐘左右就獨自離開，唔知佢跟邊位密會呢？