每逢有關乎英格蘭球隊嘅大比賽之前，近年啲英國小報都好興做兩隊嘅WAGs大比併，然後最終嘅結論都係原來對家嗰隊嘅WAGs都唔差喎，不過，贏嘅始終係我哋……然後自我陶醉一番。
不過，今次曼聯對拜仁嘅歐聯大戰，焦點就唔同晒。鬼咩，曼聯喺莫耶斯帶領下咁多負面新聞，而最新一單仲係曼聯四子學人網交裸聊，點會唔多人講呀？雖然，包括贊奴沙同香川真司在內嘅紅魔四子今次斷正，好多人都覺得係因為佢哋衰鹹濕兼網絡安全意識低，即係好似啲阿伯外遊時唔記得熄手機流動數據，結果張電話費單好襟計一樣。但係，我個人就覺得呢四子咁樣玩裸聊法，都係自我陶醉嘅一種，佢哋只係想睇到螢幕對面嘅人，點樣照自己嘅意思做嘢，令佢成為自己嘅傀儡啫。
我亦覺得呢紅魔四子亦有俾人揭發嘅覺悟。正如再神通廣大嘅罪犯，都會想留低線索俾警察；有隨時被揭發嘅危機，咁先更加刺激嘛！
文：吾中
以女性角度看球星新聞，唔用眉筆用原子筆寫低球壇百態！