肥妹小寶「細細粒」前晚真係黑仔，由上海坐飛機返港，諗住晚上7點半點都到啦，點知架機有故障，要喺深圳降落，但又唔俾乘客落機，又唔話俾大家知發生乜嘢事，結果喺冇嘢食又空氣唔流通嘅機艙內，一直等等等等到凌晨五點幾先走得，真係嚇都嚇死。
噚日細細粒到尖東香拉出席「鄭多燕萬人騷記者會」，細細粒笑言想跟鄭多燕跳下，令佢由鯨魚線變人魚線喎。九霄驚魂之後仲識講笑，果然專業。做訪問嗰陣，細細粒猶有餘悸，佢話:「噚日傍晚5點半上海起飛，預計7點半到，點知成程機結果差唔多用咗12個鐘!其實8點幾嗰陣，已經奇怪點解仲唔降落，仲有幾次好震，震到成個人離開咗個座位，驚到唔記得問空姐發生乜嘢事，亦都冇人通知發生乜嘢事。當時我就諗好大機會係劫機，嗰陣我已經用手機篤緊遺書，前面一對公公婆婆就拖住手念佛經，後面有人祈緊禱。」
等到晚上十點半，細細粒同機上乘客先至知喺深圳降落，因為飛機冇油，去到又有機件故障，要人維修。
乘客問可否落機，因為搞好耐都唔得。結果喺冇冷氣冇食物嘅環境下，一路等到凌晨五點先至准落機。細細粒話:「機上面得番水，有啲人暈，帶咗去頭等。」問佢係邊間航空公司？佢嬲爆爆咁話:「港龍!」仲話:「你開頭唔通報，危急關頭都理解，但冇理由之後連通知講發生咩事都冇!」