【尖沙嘴】被網民戲稱為「MK-Pop」嘅三人新組合FAITH，前日下晝4點幾以旺角打扮登陸尖沙嘴嘅星光大道開騷，居然都有成百人圍觀。不過其中有一位女fans就俾人認出同佢哋一首，亦係唯一一首歌《Stop Peeping》裏面嘅女演員有9分相像，似係自己友撐自己友。
吸三妹妹仔
FAITH獨沽一味又跳又唱之後離開，估唔到極重MK味嘅佢哋，居然有經理人同助手同行，走嘅時候仲有班好似未成年嘅女仔追住佢哋，真係乜嘢人都有市場同fans嘅年代，難得有fans佢哋竟好嫌棄咁拔足狂奔，想賣甩班fans。幾經辛苦佢哋一行5人去到隔籬嘅Starbucks準備同傳媒做訪問。3個MK𡃁仔就坐喺咖啡店同幾個傳媒傾咗成一粒鐘到差不多7點左右，而門口就有3位未成年嘅少女喺度癡癡地等。到佢哋傾完行出門口，嗰3位少女就走埋去主音Hiu Yong度問佢攞簽名同影相，搞到Hiu Yong好開心。
食齋賀出道
當工作完成後，估唔到FAITH有咁多助手，但連接載嘅車都冇一架，三個分道揚鑣各自徒步行去唔同方向。其中兩子就往旺角方向行去，獨剩Hiu Yong一個人行咗去北京道1號，原來佢約咗家人去咗樓上嘅功德林食齋。見到Hiu Yong一家好人齊由BB到70幾歲嘅老人家都有，足足坐滿一張12人大枱，有乜嘢好得過一家人齊齊整整食晚飯咁開心。
採訪、攝影：畢紹基、朱志聰