89年4月啟播嘅港台王牌節目《頭條新聞》，今年原來踏入25周年，噚日四位主持人包括吳志森、曾志豪、林超榮同羅啟新，約埋一班貴賓為25周年「一錘定音」，敲響鑼鼓為名為「來自頭條的你」嘅《頭條新聞》慶生活動揭幕，其中林、羅二人大玩星星熱，化身都敏俊同千頌伊，拍住節目紅人「太后」同「小豪子」帶領嘉賓返回25年前針砭時弊一番。
余若薇籲捍衞法治
公民黨余若薇都係貴賓。佢被主持人遞上三個分別代表法治嘅法官假髮、代表特區嘅一男子假髮，以及染到七彩寓意人大釋法嘅假髮，問佢邊個髮最大？余大狀點會唔識揀，即刻話梗係法治最大，佢大嘆𠵱家嘅法律淪至為權貴服務，呼籲大家一齊捍衞。
同樣有出席活動嘅飛哥李鵬飛不忘話當年。佢話肥彭最近訪港，問人點解會有人攞住龍獅旗周圍走；重提肥彭當日被魯平指為千古罪人，點解今日好似變咗中國嘅好朋友？感慨肥彭好似變咗喎。
歌手夏韶聲都有嚟賀壽，仲高歌一曲《交叉點》，回顧《頭條新聞》25年嚟歷盡嘅風雨，鼓勵大家堅持下去。