作為警方公關大旗手嘅警察公共關係科PPRB近日換阿頭，由曾做過前特首曾蔭權副官嘅許鎮德接替被傳媒稱為「黃大仙」嘅黃國偉做PPRB總警司。洋名Steve嘅許Sir1986年浸大生物系畢業後就加入警隊，曾駐守西九龍同東九龍區，亦做過被視為警隊隱密單位嘅保安處。
許Sir於2007至2010年被調派當時任特首嘅曾蔭權副官，負責打點統籌特首出席活動接見賓客嘅事務。許Sir原來更加係羽毛球高手，𠵱家係警隊羽毛球會主席嘅佢舊年帶領會員，喺世界警察消防運動會上贏咗羽毛球賽冠軍，佢仲試過約同樣愛打羽毛球嘅前警隊一哥兼煲呔細佬曾蔭培切磋球技，大讚曾Sir保持水準。