英超經過最近一輪比賽之後形勢又有變，利物浦藉車路士失分加上喺周日主場4:0大破熱刺，以8連勝強勢衝上榜首。雖然領隊羅渣士仲忍得住唔講爭標，但紅軍只係剩番6場波，要一搔24年之癢贏頂級聯賽冠軍真係唔係冇可能。不過紅軍要衝冠仲要過兩大難關，4月中下旬喺主場先後迎戰曼城同車路士，食粥食飯睇呢兩日。
利物浦喺2014年英超一直保持不敗，大勝熱刺之後佢哋喺聯賽已經連贏8場，包括喺3月份5戰全勝。贏波後利物浦32戰拎71分（見附表），領先第2位嘅車路士兩分；而第3位嘅曼城就喺少踢兩場下落後4分，計失分仲係比紅軍少，所以嚟緊4月13日利物浦主場迎戰曼城，話係冠軍前哨戰都不為過。
迎戰曼城車仔好關鍵
利物浦最近喺英超輸波，已經係上年年尾聖誕新年快車，接連作客曼城同車路士都喺先入波情況下輸1:2。紅軍先喺兩星期後主場迎戰曼城，再喺4月27日喺晏菲路球場鬥車路士。如果利記可以成功報到仇拎晒6分，奪冠機會真係非常之大；睇番佢哋餘下3場作客比賽嘅對手，全部都係下游分子韋斯咸、諾域治同水晶宮，照計贏面好高。
雖然利物浦奪標形勢唔錯，但領隊羅渣士賽後都依然好保守咁話：「我哋好尊重車路士，佢哋有世界級領隊，骨幹陣容亦合作咗好耐；至於曼城係歐洲足球嘅新強大勢力。不過我亦有自信紅軍可以贏任何對手，因為我哋嘅賣點係打整體，逐個秤可能唔及其他豪門，但夾埋就有威力。贏英超冠軍？呢個當然係我哋嘅目標，𠵱家亦似有機會，但我哋要做嘅依然係集中精神去準備眼前每一場比賽，除咗韋斯咸唔會諗其他嘢住，一切都要逐步嚟。」
熱刺輸波傳領隊打人
利物浦爭標形勢好，連巴西名宿卡富都讚好，一路睇波一路喺佢Twitter度大讚紅軍奪標機會唔低，又特別對利記後防小將法拿根情有獨鍾，話佢係「RedCafu（紅卡富）」，同佢一樣咁好波。至於熱刺就慘嘞，領隊舒活似乎已經冇心機教波，贏輸好似都唔關佢事咁，更有外國傳媒話佢賽後喺更衣室打蘇爾達杜。呢位繼續唔識入波嘅西班牙前鋒，隨即否認傳聞。
