一條長七米嘅鯨魚屍體，大前日俾人發現擱淺喺北區紅石門灘，兼開始腐爛。呢件事咁啱就同彭浩翔導演嘅新作《香港仔》當中嘅劇情好似，話說戲中古天樂、梁詠琪同囡囡一家三口關係好疏離，當香港出現鯨魚擱淺嘅消息，就即刻同其他香港人一樣加入拯救行動，最後令到原本冇交流嘅一家人，變得團圓。
封預言家
彭浩翔噚日接受訪問時話，拍呢場鯨魚戲係想講大家好多時一離開咗自己熟悉嘅環境，就會好似鯨魚離開咗水一樣覺得有所缺失，佢話：「睇到單新聞都覺得好意外 ，因為套戲呢頭有講鯨魚擱淺，又馬上有擱淺出現。我好多朋友即刻打嚟問我，因為唔止鯨魚，套戲有講到喺灣仔掘到炸彈，點知早排就真係喺灣仔掘到戰時炸彈，當然係因為巧合，不過就俾我啲朋友封咗做預言家。」彭浩翔講笑話好多朋友見佢講嘢開口中，就話要佢寫古仔時，加入一啲佢哋發達嘅劇情喎。
撰文：馮仁昭
