前晚香港黑雨兼好多地方落雹，連又一城呢啲高級商場都頂唔順呢場200年一遇嘅大暴雨，天花倒塌兼嚴重漏水，港鐵站更出現瀑布奇景，搞到好似水上樂園咁；一批落雹改圖喺網上瘋傳，等市民巧驚驚之餘都笑番吓。唔少人都覺得喺3月落雹兼黑雨，天降異象必有妖孽；有網民就歸咎狼振英，話佢上任以嚟試過兩次3月落雹，仲唔係佢嘅好帶挈？
「香港有冤無路訴」
天降異象到底係咪凶兆現象？八方問過玄學家麥玲玲，佢話：「天垂象，見吉凶，古時6月飛霜必有冤情。」雖然今次落雹喺3月而唔係6月，但玲玲師傅話呀，古時視落雹為凶兆之象，反映民間有冤情，統治者唔聽民意。
咦，狼振英上場後，689管治班子咪被轟漠視民意囉？玲玲師傅似乎好認同，佢話今次香港廣泛地區大規模落雹，表示香港民情有好多冤屈無路訴，指689班子借咗聾耳陳隻耳，民怨沸騰，「連個天都睇唔過眼要落雹，警告梁振英政府」。
適逢今年係政改年，玲玲師傅對成功爭取普選唔多樂觀，覺得今年政改爭普選嘅路途會荊棘滿途；查實一日由狼英管治，香港重歸正路都唔容易。
網民改圖
■鯊魚都游咗去商場？據聞係真㗎，但事發地點唔係香港，網民只係用嚟抽落雹水。
■九龍塘港鐵站出現一條激流，霎時變身水上樂園。
■又一城變成澤國，連Eason都話適宜喺度睇水舞間。
mailto:[email protected]