英格蘭推出世界盃新波衫，仲搵嚟一班球星嚟影宣照相（圖），隊長謝拉特同主力射手朗尼呢啲球星梗係走唔甩啦，冇大驚喜，所以我求大俠嘅焦點都係放喺啲邊緣人身上。照道理，搵得嚟影宣傳相嘅，都有好大機會有份踢世界盃，所以今次有份影相嘅邊緣人，應該都係領隊鶴臣嘅心水，其中包括利物浦嘅翼鋒史達寧。
上仗英格蘭對丹麥嘅友賽，鶴臣搵咗5個利物浦球員打正選，明抄紅軍𠵱家嗰套踢法。呢次宣傳新波衫，英足總仲搵嚟名氣一般嘅史達寧，唔通暗示英格蘭將會繼續重用利物浦球員同埋套戰術？除咗史達寧外，愛華頓嘅巴克里、阿仙奴嘅阿歷士張伯倫兩位新星都有份做模特兒，唔通佢哋都會去巴西？
英格蘭呢次影宣傳相以年輕球員為主，可能暗示國家隊都要年輕化，就咁睇嚟，係可能暗示卡域克、巴利、迪科爾呢班老將今屆世界盃都係冇運行囉。