中信泰富（267）上周宣佈以「蛇吞象」方式收購阿媽中信股份，涉及資產近2,250億元（人仔．下同），變相滿足了中信集團來港整體上市的壯志雄心。有關公佈在上周三晚發出，但當日下午《多維新聞網》已率先披露呢個訊息，字裏行間仲透露出「今鋪擺明係益香港啦」的維穩味道。據中資機構工作嘅朋友仔分析，《多維新聞網》向來是中共放風的主要渠道，揀呢個時間爆料，似乎是想令大家有個先入為主的觀念，覺得呢單deal真係有人「送大禮」，係乜「國企改革一大突破」云云。
所謂整體上市，有幾整體呢？翻查在香港上市的中信系公司，除了已賣殼予阿里的中信21（241）外，其餘全是透過中信股份來持有。而這批公司，即中信証券（6030）、中信銀行（998）、中信資源（1205）及中信國際電訊（1883），截至去年12月底，他們所歸屬於中信股份的股東權益，已超過1,700億元，佔今次中信泰富打算買入的資產大概76%左右。咁即係今次所謂整體上市的資產，好大部份本身就已喺香港上市了。咁樣重組，有幾突破呢？就算中信最後真係遷冊，對香港來說，都係多隻紅籌而已，冇乜實質意義。
而且是次中信泰富要買嘅係國家資產，作價不可能低於1倍book，否則即係賤賣，死梗。如果有一定溢價，就更搞笑，將件貨「左袋搬去右袋」都要畀多一截，仲要向市場大抽水。如果海迪係中信泰富股東，會覺得有啲屈機之嫌。
海迪