Suwannah（左）平時係專業化妝師，今年首次入大球場幫人畫花面，佢一頭紅髮故然搶鏡，所以吸引唔少小朋友嚟幫襯。至於呢位喺香港出世嘅妹妹Sophie（右），前日啱啱6歲生日，佢爸爸Mark喺22年前由英國嚟港定居，每年都入場睇7欖，唯一一次缺席就係Sophie出世嗰屆；Mark仲話囡囡長大後一定畀佢打欖球喎。
啤酒女郎嗌辛苦
大專生Harriet（圖）入場兼職做啤酒女郎，仲特登用40蚊買咗串花做頭飾，話想自己個造型突出啲喎；做完3日老兼，身形嬌小嘅佢話托住啲啤酒好辛苦，下年寧願畀錢買飛入場睇波，都唔再賺辛苦錢喎！
黃牛黨一票兩賣
7欖一票難求，有國內球迷噚日想感受現場氣氛，於是向黃牛黨（右）問價，原價$650嘅決賽日門票叫價$1,000，仲要喺晚上7點決賽前交番張飛出嚟，等黃牛黨可以賺多次錢，咁搞法兩位球迷當然唔買啦。
老式餅店賺到笑
加路連山道係通往大球場嘅主要路段，上年俾業主加租一倍嘅餅店（圖），今年生意好唔錯，上晝未夠11點已賣晒熱狗，老闆娘吳太笑番晒啦。隔鄰嘅士多就受天雨影響，飲品無人問津，生意慘淡！
