狼振英會唔會想爭取連任呢？八方覺得呢個問題，十個政界中人，十個都會話佢一定想，問題係：佢有冇咁嘅能量唧！唔係八方睇少佢喎，事關如果要坐多一屆，一定要各界支持啦，但至少喺香港好有影響力嘅地產商，都唔係個個咁buy佢，好似新鴻基地產董事局聯席主席郭炳江咁吖，噚日唔肯表態撐狼振英連任呀，坦言要「睇多幾年！」
查實新地唔係太挺狼英，有迹可尋。早前梁粉陣營搞嘅「築福香港」旗下嘅「明日之星」活動，四大地產商中，除咗擺明唔妥狼英嘅長實李嘉誠外，新地都冇贊助或參與，唔似得新世界同恒地瞓身力撐。
話要「睇多幾年」
就算有報章日前報道，中央挺狼振英連任特首，新地現階段都冇意欲押注喺狼英身上喎。事緣郭炳江噚日被記者問到，有冇聽過中央撐狼英做多屆時，最初以「唔知有咁嘅事，梁生噚日（其實係前日）都否認咗」為由，話明唔想評論；其後問及係咪支持狼振英連任，佢唔肯表態力撐，只係話：「睇多幾年！」
到底佢真係想睇多幾年先、抑或係想睇吓有冇多幾個候選人先呢？八方唔知嘞，只覺得郭炳江唔肯當面向狼英送上支持，都幾唔畀面有689票嘅堂堂香港特首囉！
八方噚日都有問到郭炳江，許仕仁涉貪案5月正式開審，身為被告嘅佢擔唔擔心時，郭炳江回應一句對官司有信心，並且多謝關心。
mailto:[email protected]