嘉里建設（683）黃小抗舊年8月起頂替辭任嘅太子爺郭孔丞，由首席執行官變身集團執行主席，不過有時職位同人工未必可以掛鈎嘅，黃小抗2013年全年連花紅總薪酬係3,084萬元，比2012年3,648萬元少咗足足15%，主要因為花紅縮水兩成。換言之，佢升職後，人工不升反跌。
不過睇嘉里舊年業績，扣除物業估值增加同埋分拆嘉里物流（636）利潤嘅核心盈利，按年倒退6%，表現認真麻麻，主席花紅縮水，小股東應該都覺得好啱數。
除咗黃小抗，嘉里其他董事舊年嘅薪酬增幅都一般，聯席董事總經理何述勤全年人工都少咗2.2%，董事陳惠明人工增幅只有1.9%，通脹都跑輸埋，至於另一位聯席董事總經理錢少華人工就增加7.3%。