現今中環OL是幸福的，Samantha講緊是買衫方面，廿年前要整個高級行政人員look係幾咁敗家的一件事，離不開連卡佛、JOYCE、詩韻咁，買得起都係天之驕女，買唔起呢？喺零網購的年代，真係扭盡六壬先襯到一件高級上班服，現時OL可喺全球網站搜羅靚衫，Zara亦成功打破平嘢冇好的定律，並成功進駐ifc黃金鋪位，不過佢哋好快就遇上競敵了，事關美國品牌J.Crew將在5月登陸中環ifc，成為亞太地區首間專門店！
J.Crew崛起逾30年，起初鋪都冇，靠郵購T恤就大受歡迎，現時多元化到BB衫、婚紗都有得賣，而最為亞洲人熟悉呢個品牌，當然是來自美國總統夫人米歇爾，當選前以至跟奧巴馬外訪都曾穿過呢個美國本土品牌，平日在鎂光燈下不乏J.Crew影蹤，簡直是死忠粉絲，J.Crew明顯受惠，自從2008年10月米歇爾以一身J.Crew的打扮出席清談節目，股價在年半之內升咗4倍，隨後更在高位私有化。
近月J.Crew再成財經界熱話，因為Uniqlo阿媽迅銷（6288）諗住打呢間連鎖店主意，但近日傳聞買方有意褪軚，謎底終於上周解開，J.Crew第四季業績甩轆，純利按年急跌42%至592萬美金，營業額僅升7%，歸咎於北美嚴寒天氣和行內競爭越趨激烈，業績搞成咁，估值又成50億美金，畀着我係柳井正，見到業務急墜，唔係接嘛？
Samantha
本欄逢周一、三、五刊出