隔牆有耳:狗哥絕食 囡囡送心心 - 李八方

隔牆有耳:
狗哥絕食 囡囡送心心 - 李八方

一班泛民中人周五起喺中環匯豐銀行外紮營絕食爭普選,但查實對佢哋嚟講,返唔到屋企見家人,仲辛苦過個肚不停嘰哩咕嚕。好似白鴿黨狗哥蔡耀昌咁吖,連日最掛住嘅,梗係屋企嘅兩歲寶貝女啦。佢話呢幾日自己冇返屋企,阿女成日周圍搵爸爸呀,認真陰功豬。
蔡太噚日就趁假期,特登帶埋囡囡去咗絕食現場搵老竇,送咗個心形氣球畀老竇,兩父女「久別重逢」嘅場面,不知幾咁溫馨。狗哥雖然絕食餓到手軟腳軟,但都特別抽咗一陣時間,帶囡囡去附近嘅公園玩咗一陣,認真廿四孝。