數政圈歌王，豈止周一嶽一個？馬會董事周永健、教統會主席鄭慕智同青協主席王䓪鳴歌喉都有番咁上下，尤其前兩位男士嘅歌喉俾唔少人讚頂呱呱。佢哋三位前日結成一體硬撼MK-Pop，喺伊館出席「2014香港青年協會賽馬會香港國際無伴奏合唱節」時，同一班嚟自英、美、日本同本地嘅唱家班，用無伴奏（a cappella）形式獻唱《I believe I can fly》，現場人士話呢三位歌手音準兼無甩嘴，周永健仲唱到瞇晒眼忘晒形。同場仲有今次音樂節大使側田、Robynn & Kendy獻唱，令唔少人聽出耳油。
青協仲推出免費手機程式App-appella，等大家可以隨時隨地排練無伴奏合唱，訓練音準同節奏。