黑牛遭殃
紅牛澳洲車手歷斯亞度都算黑，首站澳洲站賽後因違反燃料規例而被褫奪亞軍；噚日又喺比賽時因前面定風翼有問題而被罰10秒，之後喺維修站又因啲工作人員裝唔實佢架車嘅左前軚（上圖），搞到佢最終喺第49個圈退出比賽。
拒絕妥協
效力威廉士車隊嘅巴西車手馬沙（前）真係好有原則，完全唔理車隊指示，喺賽事尾段拒絕畀隊友保達斯過頭。威廉士認為保達斯有機會追到第6位過終點嘅麥拿侖車手畢頓，但馬沙覺得自己先係車隊1號車手，冇理由要佢犧牲箒。馬沙最終得第7，保達斯就第8。
星級記者
主演英劇《新福爾摩斯》嘅英國人氣男星班尼狄甘巴貝治（Benedict Cumberbatch、左），早前主持完勞倫斯頒獎典禮之後就轉戰賽車場，喺噚日化身體育記者，訪問佢嘅英國同鄉咸姆頓，同埋德國車手維特爾（右）㖭。唔知咸姆頓佢哋受訪之後，有冇問佢攞簽名呢？
