今季西甲認真激烈，爭標三雄上周末齊齊贏波，分數上繼續咬緊，巴塞隆拿憑美斯又入12碼，就咁1球作客小勝死敵愛斯賓奴，繼續落後作客險勝畢爾包2:1嘅馬體會1分。至於連輸兩場後跌落第3嘅皇家馬德里，總算喺主場出番啖氣，大勝華歷簡奴5:0。
上場對西維爾時，兩大天王C朗同加里夫巴利懷疑爭射罰球搞到面阻阻，今場唔使再爭，大家都有波入，但巴利就入兩球威少少，第2個入球仲要由自己半場怒推70碼到對方禁區，冷靜妙射入網；入波後C朗行埋嚟攬住巴利，但就面如死灰咁，唔似真係戥對方開心，可能係安察洛堤落咗「柯打」，叫佢哋做戲做全套啫。講開做戲，C朗最近就同球王比利幫阿聯酋航空拍宣傳世界盃嘅廣告，段片條橋幾好，話飛機上啲乘客喺度討論邊個先係世界最佳球員，C朗以為講自己，結果比利出現先知撞板，但兩人啲戲就認真麻麻，睇落有啲悶。