蟻民突然去世，原因由蟻公子龍博士在遺體告別儀式上致悼辭時揭曉。蟻龍博士今年38歲，在美國Case Western Reserve大學得電機工程學位，北京清華大學運籌學博士，現任正大（深圳）房地產公司總裁。正大（深圳）當然係正大集團嘅子公司，正大係謝氏兄弟謝易初與謝少飛在1921年創辦，第二代領導人即謝正民，謝大民，謝中民，與謝國民四位，發揚光大，成為一個龐大生意集團，在養雞、飼料、農業產品、電訊、房地產各方面都係東南亞數一數二嘅，匯豐出售平安保險股權，接貨人就係正大／卜蜂嗰班人啦。謝氏四兄弟各取中間名字，就係「正大中國」，當然並非巧合。正大常務董事長謝中民在告別儀式上盛讚蟻民係深圳特區之開荒功臣，八十年代初就介紹正大到深圳投資，開闢高爾夫球場，為深圳吸引國際投資者，有開山劈石之功。
蟻民曾對左丁山講，佢患上心臟病多年，曾遍訪泰、中、港、美名醫，有一名佢好信賴嘅老中醫同佢講，中藥只能「養心」，不能「治心」，心臟有事，徹底解決方法，還是換心，於是佢在泰、中、港、美四地入醫院「治心」，同時在四地申請「換心」，排隊多年後，卒在六年前，人在香港，坐車在東區走廊回家之際，手提電話響起，香港某醫院打電話俾佢：「排隊輪到你，會否做手術？」蟻民自不然連忙取消所有其他約會、行程，暫不回曼谷，留港做換心手術，結果非常成功，香港心臟外科醫生手術高明，令佢好快樂。點知換心後六年就患上胰臟癌，真難搞。左丁山二十幾年前嘅好友賓架H就係染上胰臟癌，知道後三個月就過身，神仙難救。據講胰臟於體內被其他器官遮掩，照MRI未必照得到，照到之時，就係癌細胞開始擴散之時期，專家都難以醫治，十分恐怖。蟻民生前十分樂天，最鍾意與朋友打高爾夫，飲紅酒、嚐美食，然後抽一根靚雪茄。當然有太太支持，必不可少，蟻龍博士話媽媽多年來知道爸爸心臟有事，毅然放棄自己嘅事業與旅遊生活，專心陪伴左右，悉心照顧，令爸爸增加抗病動力。坦白講，男人沒有太太的愛，肯定沒有太大嘅求生意志。