黃夏蕙原訂前晚在北角新光舉行三場慈善騷，可是日前綵排操勞暈倒送院，她病前曾返內地和吃雞，又有發燒情況，一度擔心患禽流感和懷疑中風，經過留院三晚，夏蕙BB昨午病癒出院，並由老公潘炳烈做柴可夫來接她。
昨午2時多，夏蕙BB由女兒Maggie攙扶出院，素顏的夏蕙BB比平日濃妝更順眼，但她卻說：「好醜樣，入院冇辦法。」離開時不忘笑說趕着回家化妝。
粉絲硬闖探病
母女餅印一樣，夏蕙BB聲稱Maggie是她和舊情人胡百全所生，夏蕙BB大讚Maggie省鏡，並指她早年曾在外地選美賽中奪冠，女兒近年長居美國三藩巿。
看到記者守候，夏蕙BB即友善揮手，並說：「唔該晒，多謝大家辛苦咁多人等我。」講到病情，夏蕙BB說：「身體冇乜氣力，我唔係流感同中風，只係太弱，平時我都血壓低，缺氧就暈，令大家掛心，唔好意思。醫生要我唞吓唔好再操勞，一操勞血上唔到腦就再暈。」對於被誤傳死訊，夏蕙BB表示不介意，留院期間有內地粉絲欲硬闖病房探望，夏蕙BB說：「之前未驗出係咪流感，港督嚟都唔入得。」
堅持跳鋼管舞
夏蕙BB邊說邊展示左右手被紗布覆蓋的抽血拮針位置。夏蕙BB早前被指口齒不清疑中風，她說：「我之前冇口水口乾，聽日覆診，血壓仲低，醫生畀咗止暈藥我。」病癒的夏蕙BB說話仍有氣冇力，雖醫生要她多休息，但她仍記掛着慈善騷延期安排：「改咗7月29同30日，兩日四場，我會保留跳鋼管舞。」
此外，傍實夏蕙BB的Maggie，此行特別回來撐母親慈善騷，卻變成到醫院照顧她，Maggie指不清楚母親身體差。
採訪：王連連
攝影：黃文偉
