【記者譚靜雯報道】市區重建局早前用金錢利誘觀塘物華街的小販遷出，又向商販承諾，本月中可遷往觀塘前政府合署的臨時小販市集。不過市建局證實，臨時小販市集工程至今仍未完工，最快四月下旬才可落成啟用。面對近10萬元賠償仍不為所動、一直堅持留守的內衣檔檔主李淑賢稱，事實再次證明市建局毫無誠信可言，一次又一次違反承諾，遷入新市集日期再推遲多一個半月。
「呃咗接受賠償嘅商販」
物華街及協和街小販檔在觀塘屹立30年，市建局早前承諾待臨時市集落成後可「無縫交接」，但今年一月又突然通知商販要在農曆新年前交吉，市建局觀塘項目總監李樹榮上月初更指「無縫交接」只是概念而非「承諾」，用金錢利誘商販遷出，又指臨時市集最快2月底至3月可竣工。
不過，記者昨到臨時小販市集的地盤視察，現場所見有不少工人在大雨下趕工。市建局發言人證實，工程未完工，若一切順利，最快四月下旬可落成啟用。
一直堅持留守在物華街的內衣檔主李淑賢批評，市建局毫無誠信，「佢哋呃咗嗰班接受咗賠償嘅商販，佢哋冇誠信，講過嘅嘢唔算數，拖完一次又一次，我早早就知道佢3月一定趕唔到畀我哋搬入去，𠵱家證明我冇睇錯，佢哋真喺做唔到！」她指，市集只餘她一檔，生意大跌八成，「講真佢賠償嗰筆錢我真喺賺唔到，因為少咗好多客，但冇問題，我一直都唔係為錢」。
李淑賢指從不後悔堅持留守的決定，只為尊嚴及原則生存，「市建局覺得用錢可以搞得掂，但我要話畀佢哋聽唔係所有嘢都可以用錢解決」。短短兩個月與市建局抗爭，李淑賢坦言，市建局高層從不直接與受影響商販溝通，「淨係識得搞小動作，嗰時得番我一檔，就日日搵職員行來行去，又圍板想趕絕我」，令她確切感受到，市建局只懂壓迫小市民，「總之我要你哋聽聽話話」。