【本報訊】寶馬山上樹仁大學，昨日出現長長黑衣人龍，出席校長鍾期榮追思會，共約1,400人。在七萬名校友和學生心中，她是慈母和嚴師，留給他們無數回憶。追思會上一同默哀，多人忍不住啜泣；然而多位校友分享鍾校長趣事，卻引起連場笑聲。三分悲傷、七分歡笑的追思會，為鍾校長燦爛人生畫上句號，永遠懷念這位自嘲「固執的儍瓜」的樹仁之母。
記者：倪清江
樹仁之母點滴：義助學生墊支學費
追思會上發言的葉臣龍，是鍾校長在浸會學院任社會工作學系系主任時的學生。1971年她決定創辦樹仁當晚，特別叫他到家裏告知這個消息。葉說，在二年級時有三個月沒交學費，鍾期榮召見他，「佢好嚴肅，尤其對眼烱烱有神，我都驚驚哋」。當刻想着總要作個理由解釋，他便推說無補習而沒有收入，父母有經濟困難未能給他交學費，「其實都係真嘅，但冇咁嚴重，拍拖先係最重要（原因）」。
鍾的眼神不再如初時嚴厲，成功過關。「佢之後好慈祥同我講，你下一個月開始，就交（欠款）嚟畀我」。他知道鍾代他先交學費，再分期向他收回。
送小禮物慰勞教員
樹仁社會工作學系系主任的區榮光，12歲打工養家，曾在碼頭當苦力，20歲時鍾校長得知他的情況，取錄他入讀樹仁，改變區的命運。有年他由英國返港，被鍾校長說服他回校教書。
區指校長相當慳儉，但對人很寬容，「我喺房間不停開冷氣，校長自己開晒窗同門。校長知道我開冷氣，因為啲冷氣機水直接滴落校長室出面，但從來冇話我！」慷慨尚有另一事，「佢知道我辛苦，會靜靜地買個旅行套票（給我）；我最繁忙時，又會送上小禮物，用個黑色盒仔裝住，故作懸疑，打開時原來係隻塑膠小鹿，我好感動，校長竟然用咁同我開玩笑」。
半夜回校嚇倒學生
工商管理學系系主任司徒永富1980年入讀樹仁，即使家人不贊成，他仍堅持做三份兼職交學費。
有年他參與籌備迎新營，遇上颱風，同學卻想繼續舉行，於是留校商討。其時仍在灣仔洋房校舍，鍾校長破天荒留下校舍鑰匙給他們，然後離開。「到夜晚9點，有同學大嗌，有人開門，係咪打劫？跟住有個細小身影飄咗入嚟，原來係鍾校長，佢順便攞咗一袋生果嚟畀大家，臨行前亦都擺低咗幾百蚊我哋消夜」。其後他籌組學生會，鍾校長很緊張，在他上堂時傳紙仔召他到校長室，「當然校長意思係叫上埋堂，先去見佢。本來冇乜心上堂，收到紙仔更加忐忑！」
難忘湖南話混粵語
樹仁校友會副主席潘琪偉直言是貪玩學生，當年校內只有數個系會，有人提議籌辦校園民歌比賽，「直情係攞嚿石頭掟到一個好平靜嘅湖面，有人叫咪搞，盞俾校長鬧」。數人膽粗粗向鍾校長提出，出奇地她非常同意，「不過校長落咗兩條『天條』：第一唔可以影響學習進度，第二唔可以走堂去玩。你知系際打波點可能唔走堂去打？搞到我哋頭都大埋」。鍾校長廣東話帶有重湖南口音，很多學生都忘不了。潘憶述說：「當時幾痛苦，耳仔要豎到好長先聽到。校長講嘢好快，如果你喺門外聽到，就會有個結論：呢個人又俾校長鬧。所以𠵱家要同校長平反，校長係冇鬧我哋。」