自從哥哥喺11年前嘅4月1號開咗個好大嘅玩笑，之後嘅愚人節都唔再好玩。時日如飛，不如玩吓代言人啦。
曼聯，唔係克勤係Eason。之前已經威盡上咗神枱啦，點知近期流年不利，跌番落地，俾人輪流抽水無限key，like同dislike佢嘅都一樣咁多。
曼城，學友。實力雄厚但唔霸道，能放能收，一時大勝一時小敗；佢攞冠軍未必最多掌聲，但最少人媽叉。
車路士，蔡楓華。其實吹水吹大咗嘅嘢人人有，有冇人聽你支笛，就睇你有冇「食力」啫，一剎那光輝唔代表永恆，摩連奴好明白。
利物浦，郭富城。以前睇波只有好波同屎波，今年利記就創造多咗個稱號叫做「最有娛樂性球隊」；同Aaron一樣，佢出道之前歌手只有好聽唔好聽之分，直到佢出現先有個term叫做「好好睇嘅歌手」。
愛華頓，杜德偉。早過Aaron出道，跳舞亦唔差得幾多，仲要係新秀冠軍；但係每次難得露面，都換嚟一句「吖，佢都幾唱得喎！」好似唔識佢咁。
阿仙奴，係Beyond。以前好勁唔使講，但由於𠵱家冇乜好講，所以fans聚頭都係講番舊陣時；而歌迷同球迷嘅共同口頭禪，就係「如果呀邊個邊個仲喺度，就好嘞！」
紐卡素，劉華。紐卡素，英超入座率數一數二，球迷號稱最投入嘅fans；劉德華，可能係最有號召力嘅華人歌星。咁紐卡素最近有邊場好波？好似冇；咁劉華最近有冇唱歌？肯定冇。
韋斯咸，盧冠廷。「你鍾意咩歌手呀？」「盧冠廷！」「邊個嚟㗎，唱歌㗎咩！點解你會鍾意佢嘅？」「佢有好多好歌㗎，仲作過好多歌，譬如《最愛是誰》呀，《陪着你走》呀咁……」「嘩勁喎，男定女嚟㗎？」
至於哥哥張國榮，唔似邊隊波，只似一個人，就係費Sir；但願人長久，送畀哥哥之友，以及曼聯粉絲。
KEYMAN
now TV主持