現年48歲的美魔女羅霖在處女作電影《愛．尋．迷》中，一段跟關楚耀（Kelvin）由洗頭椅洗到上床的情慾戲份預告，已引來萬千高登巴打期待。前晚她出席《愛》片首映，再以超deep V晚裝現身，大晒湯碗胸，就算29歲的Mandy Lieu谷胸而來都被秒殺。羅霖更自爆連其7歲囝囝也想入場欣賞她的演出。為了電影宣傳，原來可以去到好盡。
陶傑首次執導的電影《愛．尋．迷》成為香港國際電影節放映電影，前晚該片在圓方商場舉行首映，一班演員包括48歲的美魔女羅霖、29歲女模Mandy Lieu、關楚耀和徐天佑等盛裝到場。兩位女主角羅霖及Mandy以黑白雙煞造型出現，雖然年輕貌美的Mandy一身黑色吊帶裙甚有睇頭，明顯有備而來，但薑始終是老的辣，當穿上白色閃片開胸晚裝到場的羅霖狂晒胸前湯碗後，Mandy瞬間被比下去。
出門口俾阿媽鬧
首映禮開始前，一班演員先上台合照及致辭，在片中有連場大膽情慾戲的羅霖和Kelvin先來個深情擁抱。陶傑在台上大讚Kelvin及早前鬧不和的Mandy，他賣花讚花香說：「唔係睇開《喜愛夜蒲》除晒嗰種，Mandy係港版安琪蓮娜祖莉（Angelina Jolie），淨係睇美色都值回票價。」
稍後羅霖接受訪問時表示宣傳後成為焦點，令她有少少感觸，她說：「其實真係有啲壓力，套戲有三個故事，我佔一個，戲份唔係咁多，但個焦點落喺我度，所以有啲緊張。同埋主要大家好好，畀個『美魔女』稱號我，咁我更加要保持自己身形同各方面。」她自爆離婚後行性感已毋須跟另一半交代，反而媽媽有微言，她說：「我出門口嗰時，我阿媽都問我做乜着到咁，有冇第二件？我話冇，得呢件，設計師Dorian預呢件衫畀我，就俾阿媽呻咗幾句。細仔見到又冇乜嘢，就好似我去ball場着晚裝咁。」
Mandy甘拜下風
羅霖又爆7歲的細仔都想到場欣賞，不過沒有帶他出席，她說：「我細仔話想嚟睇，唔係三級……應該唔係三級，有好多劇照佢都睇到，我都話畀佢知呢個係其中一個角色，係一個工作，咁佢知我係乜嘢工作。今次演出最多都係60、70分，自己唔係做得咁好，所以冇諗過會角逐新人獎，有就係bonus。」羅霖笑言該晚裝一定要挺直，因為壓力令腰部瘦了有虛位，不挺直的話很易令上身走光。
Mandy盛裝到場，但焦點落在羅霖身上，她亦甘拜下風說：「好靚，我都好想咁樣，如果我咁嘅年紀可以keep到咁就好喇！唔容易keep㗎。」她表示仍未看戲，戲入面有很多第一次奉獻給陶傑，跟男演員吳國耀（Chris）有幾場床戲，她說：「喺套戲入面都好放，拍嗰時我有叫對手Chris唔好胸襲我，事前我仲寫低咗幾個要求有乜嘢唔得。」
男主角Kelvin正身在台北拍攝錢國偉導演的電影《台北夜蒲團團轉》，他對導演讚自己在《愛》片中演出有血有肉有靈魂，感到受寵若驚。亦希望觀眾入場留意羅霖及Mandy的事業線時，不妨留意一下他的身形，Kelvin說：「羅霖真係可以去到好盡，不過都希望各位可以睇吓我，因為操到好fit有人魚線。」
採訪：卓寶花
攝影：仇志德
