北美體壇呢排焦點，算得上北美職棒大聯盟底特律老虎嘅捕手卡比拉，因為球會剛剛畀張10年總值2.92億美元（約22億港元）天價合約佢。上周五熱火適逢其會作客底特律活塞，「大帝」勒邦占士就自爆如果NBA准許呢種長約，佢肯定願意同熱火續約。
由於MLB唔似得NBA、NFL等其他北美主流運動咁有薪酬上限，所以各隊天價咁留住球星，好似老虎就用10年約留住30歲嘅委內瑞拉捕手卡比拉，卡比拉剪頭髮期間知道呢個消息，開心到彈起。相反NBA 2012年再降低球員薪酬上限，好似拜恩04至11年咁獲1.36億美元合約（見附表），相信都好難再出現。貴為NBA最頂級球星，全球人氣勁爆，勒邦占士今季人工連2,000萬美金都冇，少卡比拉成3分1，梗係不是味兒，所以大帝就話：「如果聯盟准許，我願意簽下10年3億合約，今夏就可以即刻續約。」
締大三元輕取活塞
要拎咁高人工，就起碼要有球王級表現，大帝上仗作客溜馬，向對手中鋒希拔開踭事件就真係不敢恭維，好彩上周五作客活塞，收火之餘打番MVP本色，做出17分、10籃板及12助攻嘅大三元，協助熱火以110:78輕取對手，更乘溜馬作客輸畀巫師，雙方距離2場勝差，熱火要搶東岸榜首都唔係冇機會。另外，熱火前鋒柏迪亞就宣佈，打埋今季就退休，睇吓呢位35歲防守專家，可唔可以食尾糊幫熱火3連霸。
