啱啱爆seed喺自己個私人facebook力數舊愛林宥嘉五宗罪嘅G.E.M.(鄧紫棋)，昨晚又登上《我是歌手2》……不過係之前錄影嘅。
呢晚舉行半總決賽，今次改變咗個玩法，一班歌手要以呢晚唱嘅歌，加埋下一場比賽嘅分數，要爭頭到入頭5名，先可以唱第三首歌，爭奪最終冠軍。
呢晚G.E.M.就揀咗五月天嘅《你不是真正的快樂》，呢一首歌加上G.E.M.近期發生嘅事，可以話係揀得非常之合適。但原來G.E.M.就話呢一首歌，喺兩三年前對佢意義好深，佢覺得首歌嘅每一句歌詞，都係對住佢講咁。
而G.E.M.嘅死敵茜拉，就揀咗楊宗緯嘅《洋蔥》，喺唱之前茜拉就話，佢之前有一個鍾意嘅男仔，同另一個女仔結咗婚，所以佢就話呢一首歌，可以表達到佢嘅感受。咦，都係用自己嘅感情經歷博加分咁喎!
呢晚G.E.M.就奪得第2，第3就係張杰，第1就係韓磊，而茜拉就拎咗第6，包尾係張宇。但係因為改咗賽制，所以一定要知埋下一場嘅比賽，先可以知道有冇機會爭奪冠軍。所以茜拉都仲有機會再次挑戰G.E.M.。
但對於呢一個賽果，網民嘅反應都幾極端，有網民話：「鄧紫棋應該第一。」但係又另外有網民話：「鄧紫棋這期第二？逗誰呢，現場觀眾都什麼水準，唱成這樣得第二，敢說不是先入為主麼？」除咗討論賽果之外，仲有好多網民都話公布結果太過拖長嚟講。