呢輪泡菜國嘅明星風頭都好勁，佢哋喺中港台嘅派頭個個好似巨星一樣，不過唔好以為內地嘅明星就冇派頭，好似萬人迷女星「熱辣辣」早排嚟香港做活動，香港紅星「妙藥」、大笑姑婆「哇哇」同荷李活女影星都有出席。
等到發𤷪𤺧
當大會話要影大合照時，熱辣辣又遲遲唔出現，但大會嘅公關叫晒其他明星行出嚟，連個荷李活女影星都要戇居居企定定等佢出嚟，而妙藥同記者做緊訪問都俾公關叫停，不過妙藥行到出嚟又未影得大合照，佢都好唔高興，荷李活女星私底下都發𤷪𤺧話等邊個咁巴閉，要成村人等佢一個，後來知道係熱辣辣，當然眼睥睥佢啦！不過熱辣辣一於少理，派頭勁過晒所有明星，佢不知覺得幾威，話之乞人憎。
撰文：關仁