現年31歲的「長腳蟹」呂慧儀大前年與黃文迪結婚後屢傳有喜，但一直只聞樓梯響，日前黃文迪忍不住在微博暗示家中貓咪將做大佬及有新主人，暗洩呂慧儀懷「蟹子」玄機。不過，由於呂慧儀怕BB未夠三個月會小器，所以未肯多講半句，近日上圍由34C激升至35E的她，只表示自己「身材好咗」。
直至昨日，呂慧儀終於在微博公佈懷孕三個月的喜訊：「雖然看起來有點緊張，還看得出來我們兩個很期待蟹籽沙律的來臨是吧！今天終於能告訴大家，蟹蟹和蟹先生的生日願望都實現了！感謝大家的關心和祝福，我們都升職做蟹小B的爸爸媽媽了！」
黃文迪：仔女冇所謂
記者昨日致電恭喜黃文迪，他喜孜孜地說：「忍咗好耐，好開心。之前忍唔住喺微博暗示，𠵱家叫過咗三個月啦！」黃文迪表示暫未知BB性別，問喜歡生仔定女？他說：「冇所謂，最緊要健康，身邊好多朋友啲女好黐爹哋，但都有朋友啲仔好黐爹哋。」有否陪老婆做產檢？黃文迪說：「自己都好忙，未有時間，Koni（呂慧儀）都有睇中醫調理身體。」
究竟今次是意外還是一早計劃？黃文迪說：「其實一路都想，但做父母係講緣份，呢一刻緣份到。」黃文迪指呂慧儀未因陀B而脾氣變得暴躁，就連嘔吐也沒有。他又表示不會減少工作陪老婆，因自己是男人要負責賺錢養家，那麼會否叫太太減少工作？黃文迪說：「冇所謂，最緊要佢handle到。Koni預產期喺9月之後，自己第一次做老竇，好多嘢都唔識，比較緊張。其實Koni同屆港姐好多已經有BB，𠵱家終於輪到我哋。」
採訪：白白
