人生難料，3月20日赫然在報紙見到蟻民先生之訃聞，知佢在3月16日逝世，積閏享壽七十歲，雖云人生七十古來稀，但今時今日嘅香港，男人平均壽命在80歲左右，蟻民未免去早咗，朋友聞逝，唯有嘆一句天命難測。次日《蘋果日報》不知何故，將蟻民逝世之事，放在頭版，蟻家大感意外，託好友W來電問：「點解《蘋果》視之為大新聞？」左丁山不是編輯，當然不知是何原因，只能如此作答：「沒有甚麼大不了，正是人死留名，雁過留聲，這樣也好，各方親友一定知道。」《蘋果》新聞提及左丁山，於是翻閱舊文，去年11月12日本欄談「白鷺雙荷圖」，唉，那只是四個幾月前之事，大家與蟻民在Sevva飲下午茶，談笑風生，說泰國時事，講黃永玉畫作，好不輕鬆，當日蟻民精神飽滿，舊事與時政，都講得好清晰，因意猶未盡，還約了左丁山與好友W及兒子蟻龍11月8日在IFC利苑吃午飯，萬萬無估到，今年3月23日，就係佢出殯之期，哀哉。
3月23日星期日有馬跑，左丁山老早預約咗另一家人在沙田廂房吃自助餐，難以取消，只能在沙田遙祭。好友W曾為蟻民工作多年，囑人傳來蟻民長子蟻龍之悼辭及講話、扶靈名單。「蟻民先生告別儀式」上講話者有：正大集團常務董事長謝中民、中信集團前董事長王軍、前泰國副總理Pitak、友好陳心念、馬廷強、蟻鋒等。扶靈人士有Pitak、馬廷強、Chansak（盤谷銀行董事兼資深執行副總裁）、王稼夫、李衞平、賈衞東等。《蘋果日報》於3月24日刊出圖片，指扶靈人士（圖左二）為王軍，實誤，左方第二人其實係Pitak，王軍根本不在扶靈名單內。蟻龍博士悼辭講及，蟻民在95年患心臟病，6年前幸運地得到換心，換心成功，以為得到再生機會，點知舊年11月（即與左丁山在港碰頭之時），驗到有胰腺癌，四個月內就失去了生命。