近兩年香港政局越嚟越古靈精怪，劣質管治手段明目張膽登場，九七回歸16年，管治嘅核心價值及規矩已蕩然無存。
英治時代一切權力行使都講求手腕，令香港人唔覺得有「政治」存在。但是梁振英政府空有「玩政治」之動機，卻無相關之手腕技術，結果變成第三世界水平。
以批鬥鍾庭耀為例，梁深知自己民望冇可能翻身，但又想角逐連任，為咗令中央首肯，於是來一招釜底抽薪，開動輿論機器，再由張志剛赤膊上陣圍毆鍾庭耀，手法之落伍，打爛仔交加維園阿伯式「勾結英國特務」謾罵，令人O晒嘴。
梁振英之所以要鬥垮鬥臭鍾庭耀個人及其民調計劃，始於3月初政協李家傑兩會時發炮，明顯係有組織及有計劃地否定民調，表面仲要係要大義凛然為北京中央，借關於台獨、身份認同民調發難，實際目的係要為梁振英民望低殘搵個藉口開脫。
在香港搞政治鬥爭，要出師有名，唔可以俾北京認為係有個人目的，𠵱家正係政改角力重要關頭，邊有人會諗到梁及其盟友的一番心思，已經放在連任之上。
警查劉進圖案 手法低調
第二個更古怪係劉進圖案，警務處長力排眾議，認為未有直接證據同新聞自由有關，𠵱家刀手已落網，邊個字頭社團亦清楚，按正常處理手法，警方已多次採取犁庭掃穴，掃蕩各大社團場所，將幕後主腦「焗」出來。當各社團被「熄燈」搵唔到食，自然會有人幫手刮出幕後黑手。現時警方之低調，好似調查到此為止，唔想焗出幕後主腦。
唔好忘記，特首選舉時曾爆出黑金飯局，之後又發生蠱惑仔派錢參加挺梁遊行，黑色鄉紳為特首落區助拳維持秩序事件，黑幫打破幾十年慣例，公然介入政治，案件之敏感性，大家應該明白。
但我哋見到係先有梁振英女兒所謂「回應信報」表態，認為有人借事件反政府，之後便是警務處長多次表態，一再強調未有直接證據顯示與新聞自由有關，咁是否代表咗警方辦案方向，係將事件定性為「私人事件」，與新聞自由脫鈎後，只需將刀手交律政司起訴，判刑便結案？
先有整頓《信報》、商台，然後《明報》空降馬拉老總，調走劉進圖，隨即發生斬人事件，跟手又輪到鍾庭耀遭受文革式批判，一連串事件加起來，大家總覺得好唔妥，但又說不出所以然，呢種狀態，實在令人十分不安！
添馬男