最近「MK風」愈吹愈烈，都係源於一隊抄韓風嘅新男子組合「天堂鳥」嘅出現，網民瘋傳佢哋嘅新MV《登陸太陽》，由於「東施效顰」之下，韓式花美男扮唔到，搽晒眼影反而俾網友恥笑似人妖，之後仲出現咗「FAITH」呢隊超年輕MK組合挑機，令香港樂壇異軍突起，誓要令「MK-POP」佔一席位。
數日前其實已經有網民發現「天堂鳥」呢首《登陸太陽》，個副歌似足日本尊尼事務所，旗下7人男子組合「Kis-my-ft2」嘅一首《We never give up!》，不過呢首歌已經係2011年推出o架啦!
另外，又有網民發現《登陸太陽》原來仲抄埋另外一首歌，就係日本AV女組合「惠比壽麝香葡萄」嘅一首歌《スプリングホリデー》，同樣係2011年o架喎!仲有熱心網民將3個MV剪埋一齊，套用強國嘅說話，直頭係「無縫交接」呀！