最近Samantha心情是輸到驚，由熱炒板塊到績優股，以至冇基本因素的個股，噚日均惡劣到「甚麼也不是」。無聊上網之際有單相當矚目新聞，就是相機大廠Canon最新推出的一部相機，特別之處是機身用Canon，接環竟然是用死對頭Nikon。用過呢兩間公司產品的Samantha，一直諗唔明點解兩個品牌相機的接環，要專登買嚿轉接環，先能夠用第二間廠的鏡頭，原始時代咩？
有分析解釋，Canon今次咁順攤是因為產品是工業用途，而Canon在工業市場中是新手，反而Nikon F的接環是主流。Samantha希望兩廠能言和，因為生存空間越趨狹窄下，合作是一個辦法，有個走偶像路線的攝影師朋友，經常要好似明星咁在facebook、微博，更新自己狀態，呢啲細相都係用iPhone搞掂，再者手機有埋「美圖秀秀」，冇眼袋、瘦手臂五分鐘搞掂，除了要埋位影大相，誰要揹住部幾斤重的大牛龜為咗張facebook的細相？
當人人有這種心態，就不能奢望單賣千頌伊部Canon EOS 100D白色特別版去打救業績。Canon公佈全年業績時提到本年展望趨向保守，料按年增長4.1%，單反相機銷量料比去年少5萬部到約760萬部，數碼相機更料跌兩成至1,050萬部，兩廠股價曾因「安倍經濟學」一度興奮，家陣後勁不繼，睇嚟脫困都係要靠自己。
Samantha
本欄逢周一、三、五刊出