別以為做導演呼風喚雨，箇中壓力不足為外人道。香江第一才子陶傑平日雄辯滔滔，但執起導筒時屢遇挫折，更曾因資金出現問題而泛起自殺念頭！今集《亂噏24》中，他會跟黎智英及蔡瀾詳談細節。節目足本版逢周四晚上11時播出，讀者可在 http://bit.ly/appletalk24重溫。
撰文：馮國康、Sidekick
才子是怎樣練成的？答案是兩個字─堅持。陶傑在拍攝電影《愛．尋．迷》時，繼續寫稿及開咪，令黎智英非常佩服。陶傑說：「點敢停呀！寫嘢係我正業，呢套戲只係part-time。」羅霖見識過陶傑在片場會利用空檔低頭猛寫，不消一會便寫起文章。原來陶傑還在這段時間持續進修，每天只睡三小時，足足瘦了十磅，他說：「一樣返去上網、睇書，入番啲貨先。做人要有input，唔可以淨係有output。」陶傑認為經歷、旅行和閱讀都是input，肥佬黎提醒他：「仲有戀愛。」怎料陶傑說：「戀愛冇啦！」肥佬黎反駁：「你有老婆冇戀愛？唔好老點啦陶傑，你當我乜嘢呀！」陶傑即場表演急才：「昇華咗啦，嗰啲叫恩愛。」這下肥佬黎服了他。
向《孽緣》致敬
講到拍戲辛酸，不夠睡眠事小，有時遇到意想不到的難關事大。陶傑大爆拍攝中途曾一度出現資金問題，令他泛起自殺念頭：「有人嗌要回水，出現咗少少誤會。嗰晚我接到電話手都震埋，話我某啲地方冇履行到合約。第二朝，我即刻搭車去佢寫字樓同佢解畫，卒之拆得掂。離『自殺』兩個字差兩吋咋！」肥佬黎問陶傑是否獨攬大權？陶傑一臉錯愕：「我似唔似咁嘅人？有名你叫啦，乩童嘛，見到人就扮契弟。」陶傑去年6月拍攝時撞正雨季，其中要在六四當晚拍一個實景shot，碰巧下着傾盆大雨。身為老行尊的蔡瀾，對這些情況司空見慣：「落雨就落雨啦，一個大longshot落雨，一跳跳去特寫，整支大蠟燭喺呢度，有乜關係箒？唔頭痛㗎。」
才子陶傑諗頭多多，但拍攝時可有二次創作？他說：「話冇就假嘅，直接抄襲就冇，你睇咗一百幾十套，有啲嘢融會貫通。」肥佬黎窮追猛打：「咁你有冇抄？」陶傑說：「向《Fatal Attraction》（孽緣）致敬。」陶傑認為女人戲有龐大市場，但奇怪近年沒幾多這類電影上映。肥佬黎說：「喂呢齣唔係女人戲，有床戲喎。」陶傑即指出女人最愛床戲：「女人唔睇《豪情》？平時24小時虛偽21小時，你哋畀番三個鐘頭真吖！有啲連發開口夢都假！做得特首呀。」
《愛》片是一齣探討人性的電影，而情慾，始終以情字行先，這是人禽之別。陶傑有感而發的說：「人係需要有人性嘅追求。你鍾意住喺極權獨裁社會，定係鍾意生活喺自由善良嘅空氣？人性嘛，有人鍾意天生俾人管咩？有人天生鍾意問過阿爺咩？我唔信囉！」他又引用經典電影《卡利古拉》開場白：「一個人得到全世界，但失去靈魂又有何用？」肥佬黎問陶傑靈魂還在？他說：「我諗喺度嘅，點會話冇。少少都要留番畀自己。」
最驚過老闆關
完成拍攝後，陶傑仍未放下心頭大石，事關仍要過老闆一關。他給老闆放映時戰戰兢兢，既要看他有否看錶，又要看他可有尿意，幸好最後都收貨。其實陶傑最擔心觀眾嗌悶：「呢套戲三個古仔，如果喺歐洲，每個古仔都拍到一套。但香港人驚悶、驚冷場，一定要啖啖肉，唔好停。」陶傑拍這齣戲用了約五百多萬，未計宣傳費：「宣傳咪自己拋頭露面囉，我𠵱家咪係囉，X，賣笑㗎嘛！」肥佬黎叫他效法倪震用隻貓遮着下體拍照，陶傑說：「趕客咩？做人要有自知之明！」
陶傑總括今次做導演經驗，認為自己在能力範圍內已做到最好，至於會否眼高手低、曲高和寡已擔心不來，他又以寫專欄比喻拍電影：「專欄日日幾百字係舞台嚟，唔可以寫畀自己睇打X機，係寫畀各行各業各階層睇。」
服裝:ANTEPRIMA
社會太現實 三無人士情路坎坷
http://bit.ly/talk243701
嫁入豪門捱騾仔 好多富婆都出軌
http://bit.ly/talk243702
日瞓3粒鐘 現代傳媒人周身刀
http://bit.ly/talk243703
宅男粉絲愛床戲 美魔女出街心驚驚
http://bit.ly/talk243704
拍電影危機四伏 片場意外逐個數
http://bit.ly/talk243705
拍到一半要回水 陶傑諗過要自殺
http://bit.ly/talk243706
拳頭+枕頭一定收得 兩樣都冇係咪摺得？
http://bit.ly/talk243707
台灣人妻慾求不滿 趁細路返學睇甜片？
http://bit.ly/talk243708
媾富婆有招式 識睇風水賺多個億
http://bit.ly/talk243709
半推半就欲拒還迎 勾人上床點做至型？
http://bit.ly/talk243710