民主黨東區南豐選區區議員梁淑楨，因為嚴重中風，東區區議會去年底唔再接納佢嘅請假申請，政府決定5月18日舉行補選，提名期今日開始至4月10日結束。今次補選可謂「助理對決」，事關白鴿黨會派出梁淑楨嘅助理張國昌出選，希望接到棒，力保白鴿老巢不失；一直吼住呢個議席嘅建制派亦想趁白鴿病、攞佢命，民建聯東區區議會主席黃建彬會派出助理李清霞搶攻地盤，圖赤化南豐。
八方聽聞，新民黨之前都想搶呢個位，但最終讓路民建聯，事關無謂喺下屆區選前同民建聯結怨，若然最終冇其他人參選，有地區人士話呢場助理決戰選情五五波，不過泛民補選無運行呢個宿命，好難打破。