本周一起停牌嘅中國鐵聯傳媒（745）噚日搞咗個合作項目簽約儀式，將會有份經營海外電影入口內地嘅生意。中國鐵聯上月亦委任全國人大常務委員會前委員長萬里長子萬伯翱為名譽顧問，佢噚日仲專誠現身撐場。
萬里係中國政壇重要人物，為鄧小平改革開放政策嘅重要支持者，屬鄧小平主政時期嘅「中共八大元老」之一，除咗做過人大委員長，亦曾任國務院副總理。當時內地有一句說話指「要吃糧，找（趙）紫陽、要吃米，找萬里」，可見佢甚得民心。
70歲嘅萬伯翱本人就係資深傳媒工作者，現任中國傳記文學學會會長、中國作家協會會員等等，做過雜誌社長、總編輯，甚至於2009年製作過一套以雷鋒為題材嘅電視劇，多才多藝。噚日佢就帶埋一批佢嘅書籍出席發佈會，仲要即場簽名，相當友善。