上市公司陸續出年報,高層年薪大公開。香港電訊(6823)最新年報顯示「小小超」李澤楷愛將、香港電訊董事總經理艾維朗舊年袋3,808萬元,加薪23%,主因多咗656萬元股份報酬,底薪冇加,花紅僅微升6.3%。
艾維朗舊年其實相當落力,政府擬於2016年收回三分之一3G頻譜重新拍賣,艾維朗不時出聲維護公司利益。年底又幫老闆落實大刁,以逾188億元向澳洲電訊商Telstra同埋新世界發展(017)分別收購CSL全數股權,成為本港流動電訊商一哥,雖然單刁仲等緊監管機構批。而控股公司電盈(008)董事總經理陳禎祥舊年年薪就係1,755萬元,基本上跟前年差唔多。加得最多係財務總裁許漢卿,加薪89%,袋2,184萬元。