親中陣營嘅婦女界，最高榮譽莫過於俾中央睇中，加入全國婦聯做代表。一如全國政協委員咁，雖然只係擔當花瓶諮詢角色，但就係身份地位嘅象徵，唔少人爭崩頭霸花瓶位。八方發現，女賭后何超瓊Pansy同劉鑾鴻老婆劉洪文燕Linda，舊年底已獲中共委任入全國婦聯做代表，成為換屆後最耀眼嘅親中婦女界新星，以後喺政商界同ball場一定當「紅」。
成為「國家政權支柱」
全國婦聯有乜嘢咁巴閉？呢個係中共最高層次嘅統戰婦女團體機關，各省市有份量嘅女人都會被招攬入去，全國婦聯喺網頁自稱為「國家政權的重要社會支柱之一」，唔怪得親中陣營嘅婦女對呢個位置流晒口水；中聯辦原副主任郭莉同現副主任殷曉靜都係執委嚟㗎！首屆名譽主席仲要係宋慶齡同何香凝。
八方聽聞，有成千六人嘅全國婦聯去年底換屆後，近50個香港代表中有唔少新血，例如已身任北京市政協常委嘅Pansy，再殺入婦女界中共核心成為新丁；有政界中人相信，佢做過北京市婦聯執委，中央睇得起佢團結婦女界嘅能力。
打入呢個花瓶圈嘅新血，仲有平時較少涉足政圈嘅細劉老婆Linda。八方聽聞，Linda雖然較低調，但佢不時參與慈善活動，捐過唔少名牌衣飾手袋支持樂施會義賣，似乎中央覺得佢係可造之材，畀個位佢熱吓身咁話。
據知，其他新丁名人中，仲有參加過《窮富翁大作戰》嘅廖創興家族後人廖偉芬Jennifer，同埋名醫陳曦齡等；另外亦有唔少女性專業人士，名人效應外，仲想搞專業化喎。
mailto:[email protected]