上季玩完馬後炮，今季就做預言家，同大家一齊睇吓嚟緊周末有咩好睇。今周傾咩：英超執法需要科技協助？
戰友咖喱支持增加科技協助執法，基本上電腦比人腦又快又準，又唔會因情感因素而影響判決，理論上係可行。可惜好似老派球迷成日講，加入太多科技協助，只會令球場中止次數增加，球證盲起上嚟，連15號同28號都唔識分，唔通呢啲又要靠電腦幫手分辨咩。所以提高英超執法水平，最基本就係提高球證水準。
其實各地主要聯賽，大部份都起用番本土球證，但英超地位日漸提升，都算得上世界數一數二受注目嘅聯賽，但球證嘅水平唔見得好。以往英超名雞，普爾已經算係代表人物，但06年世界盃搞單3黃1紅出嚟，難為佢仲咁厚面皮，掛雞後仍然喺英國報紙上就執法指指點點。𠵱家英超名雞都算係韋比，光頭外表加上做過警長，眼神確實夠威嚴，亦都有壓場感，最衰就係感情用事，一吹曼聯比賽就……
睇番英格蘭球證工會介紹，要吹英超其實都唔簡單，英格蘭球證分4級，只有第1級先可以吹英超，𠵱家就有約20人具1級資格。英超球證係全職，年薪7萬鎊起，平均吹一場就再有2至3,000鎊收入，而且一年只係返10個月，另外吹盃賽、國際賽就有額外收入，加加埋埋都算英國中產收入。不過正因為升級制度嚴格，上到1級絕唔容易，可換人選唔多，變相令現存英超球證好難撤職，所以趕錯人嘅馬連拿繼續有得吹。
有競爭先有進步，英超𠵱家咁興盛，同各隊引入高質外援有關，所以英超球證都可以仿效外援制，引入意大利、西班牙名雞，咁水準先有得改善。文：牽牛