可能嫌當選得嗰105票得唔到市民關注，民建聯漁農界代表何俊賢似乎下定決心要出位，繼日前嬉皮笑臉話民主黨被抬走嘅中西區區議員許智峯個「峯」字係「瘋癲個瘋都唔定」，噚日又喺立法會IT panel攞魔童個名搞爛gag話：「我識寫王維基個名，係電視機個『機』」。
點解咁鍾意用人哋個名開玩笑？何俊賢話見過毛孟靜撐維基時用咗電視「機」個「機」，自己有樣學樣，強調唔係寸魔童，反而好欽敬佢嘅魄力。
不收回侮辱許智峯言論
至於會否收回侮辱許智峯嘅言論？呢位政圈初哥竟然寸嘴話，白鴿黨近嚟唔如意、補選又失利，若對方覺得不快，「我同佢講聲唔好意思啦惟有」，繼而寸寸槓話「下次我用玉樹臨風囉」。黃碧雲噚日喺立法會都當面要求呢位二打六道歉，何只重複「唔好意思」。