提起英超歷代門神，丹麥門將舒米高當然係代表人物，除咗幫曼聯建功立業，亦係英超5位曾經有入球嘅門將之一；正所謂虎父無犬子，周二英冠聯賽，舒米高囝囝卡斯柏舒米高就幾乎同爸爸睇齊，喺補時階段後上助攻，幫英冠榜首嘅李斯特城追平，可惜最後賽會判入球係門前補中嘅基斯活特，搞到舒米仔中空寶。
判隊友入波中空寶
舒米高呢位一代丹麥門神，除咗招牌「星形撲救」出迎夠晒氣勢，都算係入波多嘅門將，曾經幫過曼聯喺歐協盃入波，又幫維拉喺聯賽入波，周二佢個囝囝卡斯柏就幾乎同樣有進賬。
英冠榜首嘅李斯特城，喺聯賽對護級分子伊奧維，就幾乎「陰溝翻船」，客軍由祖爾禾斯喺上半場建功領先1:0，幾乎守到尾；到補時階段，李城門將卡斯柏舒米高就好有父親作風，跑上前線助攻，原本佢接應隊友傳中頭槌攻門，頂中門楣彈入，應該過咗白界先彈番出嚟，不過球證未有示意，佢嘅隊友基斯活特就加多一頭成功執雞，追成1:1平手。可惜賽會最後判呢個入球嚟自基斯活特，搞到舒米仔未能取得職業生涯首球。
李城助教奇涼治沙士比亞賽後就話：「我唔理邊個入波，最緊要係球隊可以追平，事關保持18場聯賽不敗好緊要，當然卡斯柏嘅努力好值得欣賞。」李城現以82分排榜首，領先第3位嘅昆士柏流浪達13分，睇嚟好大機會奪得頭2名嘅直接升班資格，下季有得再戰英超，對卡斯柏嚟講，比起自己入波仲緊要啦！
