香港新晉男子組合「天堂鳥」，以擺明扮韓仔姿態出道。點知新歌《登陸太陽》MV一出，真係技「驚」四方。先講造型，畫眼線都算，眼瞼上的一抹眼影，當堂傳出陣陣MK味。聽埋唱功，只聽到男士扯住喉嚨嗌歌；睇埋舞姿，結論是勇氣可嘉。
今次眼光獨到、發掘呢隊另類組合嘅公司叫「創富文化」，由一位叫莊戰嘅人兄持有。翻查資料，莊戰93年入咗TVB打工，一做就做10年。及後創立金融公司「創富環球」；另外又持有一間光學產品公司「三維實業」，更涉足舞台製作、地產、保險、旅遊、移民等業務。
莊戰因瓣數多多，亦借自已平台提攜旗下藝人（冇錯，除咗天堂鳥外，創富文化仲有藝人），好似一位來自四川嘅姑娘夏青，就係三維實業嘅代言人。菲菲唔明嘅係，好似夏青，算係唱得兼睇得；再唔係就旗下另一隊女子組合，個MV都正常啲。偏偏創富文化今次搵最騎呢嘅天堂鳥做響朵頭炮，到底背後個理據係乜？
莊戰兩年前講過，目前將呢間過份神秘嘅創富環球下年主板上市。如果到時會連經理人業務一齊上嘅，菲菲建議公司真係要檢討吓策略，搵個識嘅人去諗計捧新人。當務之急係要搵PR幫天堂鳥急救image，否則呢隻「鳥」未出道，就真係要登陸太陽自毀了。
Fifi
本欄逢周二、四刊出