前排電視風雲嘅挖角潮令藝人身價暴漲，搞到一台獨大嘅無綫都要出招穩定軍心，可惜香港電視開台無望，結果還原一台獨大局面！
噚日有報道話無綫再向藝人出招，聽講內部展開減薪真人騷，搵咗林欣彤、翟威廉、葉凱茵、許家傑等三線藝人，輪流接受樂易玲、曾勵珍同余詠珊三大高層嘅面試，要證明自己有料先有得續約加薪，過唔到關就隨時約滿叮走！
思浩：點生活
唔止無綫藝人遭殃，想食回頭草嘅港視藝人情況比想像更差！梁思浩上星期搵咗陳安瑩、陳少邦同菁瑋成班港視藝人錄影now TV嘅 《娛樂審死官》，聽講思浩喺訪問大爆本來力邀多位港視藝人受訪，結果連番被拒，其中有幾位話同無綫傾緊合約，薪酬少過港視三分二，怕無綫小器唔敢接受now訪問，仲有人想淡化王維基旗下藝人之名，希望快啲搵到嘢做，所以拒做嘉賓。馮仁昭打畀思浩，佢矛頭直指無綫：「絕對有咁嘅事，希望電視台唔好打落水狗，人哋都有家庭，冇咗三分二人工， 點生活？」另姜文杰噚日喺電台訪問話：「《童話戀曲》嘅音樂本來係買外國嘅版權，點知導演話想支持本地創作，結果我就係音樂、舞蹈總監，新版效果仲好。」
撰文：馮仁昭
