澳門賭場生意發過豬頭，帶挈銀河娛樂（027）主席呂志和變身亞洲第二大富豪，慳儉開嘅佢都要花錢買件大玩具享受生活。
呂志和噚日承認舊年買咗艘遊艇，雖然未送到嚟香港，但講起都心情相當之靚，佢冇提艘遊艇要幾錢買番嚟，只係笑笑口咁話，送到嚟香港嘅時候，要請大家上去指點吓，相當風騷。
呂志和講過，平時最鍾意食餛飩麵，被傳媒形容佢生活勤儉節約，但男人點都要買番件大玩具嘅。之前傳佢訂造咗一艘200英呎長嘅超級遊艇，𠵱家由美國運緊來港，造價應該以億元計。美國遊艇注重個性化設計，要凸顯個人品味，唔知呂志和艘遊艇會否滲出呢位新晉賭王嘅氣勢呢？
查實香港唔少富豪都有買遊艇，好似賭王何鴻燊、玩具大王蔡志明同英皇集團老闆楊受成都擁有意大利遊艇，小小超李澤楷就鍾情於英國遊艇。