「蘋果概念股」瑞聲科技（2018）一向唔多願意透露客戶資料，管理層以往多數唔肯回答有關客戶嘅問題，但噚日執行董事莫祖權竟然一反常態，喺業績會主動拎部「小米3」出嚟，指瑞聲一直都有份幫小米手機做聲學連天線嘅零件，又估計未來一年，中國定單會有增長。擺明係見到小米咁熱，乘機抽一抽水，想變成「小米概念股」。
有「國產蘋果」之稱嘅小米越來越受市場歡迎，老闆雷軍今年初應邀參加總理李克強主持嘅座談會，更被對方笑指「小米成了大米」，可見小米幾咁人氣。通達（698）今年初公佈攞到小米手機定單後，股價隨即大升，至今累升七成，近日仲喺高位批股集資，難怪其他上市公司都想跟小米拉上關係，唔少電訊商亦以有小米賣作招徠㖭呀。