內地恢復在香港行使主權都已經16年，一眾親共人士本來磨拳擦掌準備上位，奈何北京大局為重，唔敢去得太盡，全面由深紅勢力接管，由此形成一股怨恨，再變成政治毒瘤，揮之不去。呢棚人九七前上位首本戲就係搞陰謀論，揭露英方新機場工程花光香港一分一毫，揭露福利快車車毀人亡，揭露民主派勾結英美勢力，受CIA資助顛覆內地，當然少不了英國出身軍情六處之前布政司霍德及前CPU首席魔僧顧汝德為將來特區埋炸彈陰謀，最重要當然仲有鬥垮鬥臭肥彭呢個妓女加千古罪人。
推銷陰謀論 開脫低民望
究竟有冇人計過當日所有被視為英方陰謀及炸彈地雷有冇爆炸將香港摧毀，新機場十大工程令香港保持交通樞紐地位，如果當日立法局財委會否決機場撥款工程，拖到九七後先搞，香港空運中心地位早就衰過深圳及廣州。真正成功落實監控英方賤賣土地陰謀乃中英土地委員會，規定九七前每年賣地上限不超過五十公頃，製成了九十年代樓市大泡沫，成功為九七後董朝埋下炸彈，親共專業人士包括梁振英實在功不可沒。
九七前靠向北京推銷陰謀論已成功上位者，不少已淡出政壇，羅德承、新港盟、劉漢銓、港進聯俱往矣。由九七前鬥港英，九七後繼續鬥泛民及英美勢力，揭露英美和平演變、輸出顏色革命、茉莉花革命等驚世陰謀，到今日上位掌權者，就係梁振英及其一眾友好。佢哋首本戲三十年不改，開口埋口就英美勢力亡我之心不死，美國重返亞洲，夏千福出任駐港領事、霍德重回香港，指揮鍾庭耀，發動戴耀廷（下刪一千字）。呢種戰略高度思維，唔知就嚇死，知嘅就笑死。猶如文革期間，一樣陰謀論橫行，有人對住毛澤東像放屁，立變現行反革命，至於屋企有親戚在美加，唔可以俾人知，否則變成勾結境外勢力。
近日批鍾庭耀民調，乃文革式批鬥舊病復發，再加上一眾陰謀論高手，集體運用戰略高度思維，去揭露英國潛伏香港特工幕後扯線，原來梁振英民望低殘現象，係英國特工在幕後進行政治操作，目的係要污衊梁振英！
咁荒誕之政治陰謀，你信唔信？反正北京有人會信就成功了！
其實，推銷呢種陰謀論之人，借此搵食多年，食到𠵱家，可能連自己都唔多信，但總之就手、方便、亂咁噏、似層層，陰謀論呢家嘢又冇得證明，兼且又可投共產黨所好，成功spin到北京班官，為梁振英低民望開脫，咁就ok掂晒。
添馬男